Ishni muvaffaqiyatli tark etish

06 Jan 2022

[Inglizcha versiyasini bu yerda o’qishingiz mumkin]

Ish faoliyatimiz davomida har birimiz kamida bir marta lavozimdan bo’shash arizasini yozishimizga to’g’ri keladi. Bu boshqa kompaniyaga o’tish, nafaqaga chiqish yoki o’z biznesingizni boshlash kabi turli sabablarga ko’ra bo’lishi mumkin. Sababi nima bo’lishidan qat’iy nazar, jamoangizni muvaffaqiyatli tark etish muhimdir. Ba’zilar, umid qilamanki, ko’pchilik emas, nega bu borada ortiqcha harakat qilish kerak deb so’rashadi. Sababi, bu xuddi ishlatilgan salfetkangizni axlat qutisiga tashlash qanchalik muhimligi kabidur. Umuman olganda, bu yaxshi inson va bizni holatda yaxshi mutaxassis bo’lishingiz uchun muhim sanaladi.

Shaxsan o’zim quyida tasvirlamoqchi bo’lgan professionallikning mukammal namunasi bo’lmasam ham bunga erishishga harakat qilmoqdaman :P

Unday bo’lsa, kettik…

Birinchi narsa - ishdan ketishingiz haqida xabar berish. Xabar berishda muhim narsa, uni imkon qadar erta berishdir. Shartnoma bo’yicha majburiyatingizdan ham oldinroq. Sizning bilim va mas’uliyatlaringizni jamoaga o’tkazish va o’rningizga boshqa odam yollashga yetarli vaqt bo’lishi jamoangizni sizni yo’qotishdan osonroq tiklanishga yordam beradi. Menimcha, kompaniyadagi odamlarni rejalaringiz haqida quyidagi tartibda xabardor qilganingiz ma’qul: menejeringiz, HR, keyin esa jamoa a’zolari. Muloqotda minnatdor, hamdard va ijobiy bo’ling.

Xabar berganingizdan so’ng, ketguningizgacha bo’lgan davrda ish faoliyatingizni oddatdagidek davom ettirish muhimdir. Oxirgi oy ish joyida hech narsa qilmagan inson bo’lmang. Biroq, buni qilish qiyin bo’lishi mumkin, chunki sizning kompaniyangizda endi uzoq muddatli maqsadlaringiz yo’q va kam ishlashingiz bu tez orada ketishingiz belgisi bo’lib ko’rinadi.

So’nggi ish kunlarizda sizga katta mas’uliyat yuklanmaydi va siz yangi funksional ishlab chiqishda muhim rol olmasligingiz kerak. Buning o’rniga, sizning yagona e’tiboringiz muvaffaqiyatli tark etishda bo’lishi kerak: kodlaringizni hujjatlashtirish va bilim/mas’uliyatlaringizni boshqa odamga topshirish.

Jamoadoshlaringiz bilan mustahkam munosabatlarni saqlab qolish doimiy qilishingiz kerak bo’lgan narsadir. Biroq, ushbu munosabatlarni hozirgi kompaniya doirasidan tashqarida ham kengaytirish uchun sizning kompaniyangizning ichki aloqasidan tashqarida qandaydir tarzda ular bilan bog’lanishingiz muhimdir. Albatta, eng yaxshi usul LinkedIn va shunga o’xshash professional tarmoqlarda ular bilan bog’lanishdir.

Kompaniyadan ketish intervyusida (exit interview) “Ketishingizga nima sabablar bo’ldi?”, “Bu kompaniyada ishlashning qaysi jihatlari sizga yoqmadi?” va “Kelajakda nimani yaxshiroq qilishimiz mumkin?” kabi savollarga javob berishga tayyor bo’ling. Sizning salbiy fikr-mulohazalaringizni bildirishingiz kompaniya uchun foydali bo’lsa-da, agar bu sizga mos kelmasa, buni qilmaslik mutlaqo ma’qul. Shaxsan men, agar ular bu borada biror narsa qila oladi deb o’ylasam, konstruktiv salbiy fikr bildirishga harakat qilaman.

Offboarding muddatida, sizning mas’uliyatingizni o’z zimmasiga oladigan insonlarni faol ravishda izlash muhimdir. Siz ketganingizdan so’ng, keyingi odam sizning ishingizni shundoq olib ketadi deb o’ylamang. Sizning mas’uliyatingiz bilan qiziqadigan jamoa a’zolarini toping va ularga ma’lumotlarni hujjatlashtirish va bilimlaringizni uzatish seanslarini taqdim etish orqali ishingizni davom ettirishlarini osonlashtiring.

Oxirgi, lekin eng muhimi, rezyumeni yangilashdir. Uni unutish juda oson, chunki siz yaqinda yangi ishga kirgansiz va bunga ehtiyoj sezmasligingiz mumkin. Buning yomon tomoni shundaki, keyingi safar rezyumeni yangilash kerak bo’lganda ko’p tafsilotlarni unutgan bo’lasiz. Shunday qilib, rezyumeni yangilash uchun vaqtingizning 30 daqiqasini ajrating.

Hozircha hammasi shu. Endi siz bu artiklni o‘qib chiqqaningizdan so‘ng, keyingi safar ishdan ketayotganingizda qanday qilib zo’r offboarding qilishni ko‘rsating :)

Yaxshi inson bo’ling :)

Khojarbu Khaitmetovaga bu postni uzbek tiliga tarjima qilib berganlari uchun raxmat.